"ҚазАвтоЖол" ҰК Абай облыстық филиалы баспасөз қызметінің хабарлауынша ,Абай облысында соңғы күндері күн райы күрт бұзылды. Боран саларынан облыстағы кейбір жолдар жабылды. Осы күндері жол саласының мамандары күшейтілген режимде күні-түні кезекшілік атқарып жатыр. Қар құрсауында қалған, жолдан шығып кеткен 50 ге жуық көлікті құтқарған,-деп хабарлайды abaidan.kz ақпараттық агенттігі.
Олардың ішінде жолаушы тасымалдаған автобустар да бар. Мәселен, «Қарағанды-Аягөз-Боғас» тас жолында тоқтап қалған автобусқа «ҚАЖсервис» ЖШС мамандары көмектескен. «Алматы-Ақжар» бағытында кетіп бара жатқан көлік қатты бораннан жол шетіне шығып кетіп, бір күн бойы тұрып қалған. Көмекке ДЭУ-71 мекемесінің мамандары келген. Арнайы техникамен автобусты қар құрсауынан әрең алып шыққан. Абырой болғанда ондағы жолаушылар мен көлік жүргізушілері дін аман.
Оқыс жағдайлардың алдын алу үшін, мамандар жолаушылар мен көлік жүргізушілерін ұзақ жолға шығарда сақтық танытуға шақырады
