Жолдау 79 қаралымabaidan.kz

Жолдаудағы міндеттер – өңірлік дамудың нақты жобалары

Жолдаудағы міндеттер – өңірлік дамудың нақты жобалары

Абай облысында инфрақұрылымды жаңғырту, өндірісті өркендету және әлеуметтік нысандар салу бағытындағы жұмыстар қарқын алып келеді. Бүгінде еліміздің әр өңірі Президент Жолдауында белгіленген стратегиялық міндеттерді жүзеге асыруға кірісті. Бұл ретте Абай облысында да экономиканы әртараптандыру, көлік-логистика әлеуетін арттыру, ауыл шаруашылығын дамыту, цифрландыру және халықтың өмір сүру сапасын жақсартуға бағытталған бірқатар ірі жоба қолға алынған.

Мемлекет басшысы Қасым-Жомарт Тоқаев «Жаңа тарихи кезеңдегі Қазақстанның өзекті міндеттері» атты Жолдауында елді ауқымды құрылыс алаңына айналдыру қажеттігін атап өтті. Бұл міндет Абай облысы үшін айрықша маңызды. Өйткені жаңадан құрылған өңірдің инфрақұрылымын дамыту, өндірістік әлеуетін арттыру және әлеуметтік нысандар желісін кеңейту – уақыт күттірмейтін мәселелердің бірі.

Өңірдің географиялық орналасуы оның көлік-логистикалық әлеуетін дамытуға үлкен мүмкіндік береді. Осы бағыттағы стратегиялық жобалардың бірі – «Аягөз – Бақты» теміржол желісінің құрылысы. Жалпы құны 577,5 миллиард теңгені құрайтын бұл жоба Қазақстанның транзиттік мүмкіндіктерін кеңейтіп, Қытаймен сауда-экономикалық байланыстарды нығайтуға ықпал етеді.

Ал Семей қаласында Ертіс өзені арқылы өтетін жаңа төрт жолақты көпірдің құрылысы жүргізілуде. Бұл нысан қаланың көлік қозғалысын жеңілдетіп қана қоймай, екі жағалаудың арасындағы байланысты жақсартуға мүмкіндік береді.

Жол сапасын жақсарту бағытында да нақты нәтижелер бар. 2026 жылғы 9 қарашада «Семей – Ресей Федерациясының шекарасы» автомобиль жолының 111 шақырымындағы жөндеу жұмыстары толық аяқталып, пайдалануға берілді. Осылайша, маңызды халықаралық көлік дәлізінің нормативтік техникалық жағдайы 100 пайызға жеткізілді. Жол бойында қауіпсіздік шаралары күшейтіліп, малдың жолға шығуын шектейтін қоршаулар, жаңа аялдамалар мен демалыс алаңдары орнатылды.

Бұдан бөлек, облыстық және аудандық маңызы бар 212,6 шақырым жолда орташа жөндеу жұмыстары жүргізілуде. Бұл жобалар шалғай елді мекендердің қатынасын жақсартып, жүк тасымалы мен кәсіпкерліктің дамуына жол ашады.

Президент Жолдауындағы маңызды міндеттердің бірі – экономиканы әртараптандыру, өңдеу өнеркәсібін дамыту және инвестиция тарту. Абай облысында бұл бағытта ірі өндірістік бастамалар жүзеге асырылып жатыр.

Солардың қатарында Ақтоғай мыс балқыту зауыты, алтын өндіру фабрикасы, «Айдарлы» тау-кен байыту комбинаты және ет өңдеу кешендері бар.

Өңірде инвестициялық жобалар саны да артып келеді. 2026 жылғы 5 қарашада облыстық үйлестіру кеңесінде жалпы құны 8,4 миллиард теңгені құрайтын, 695 жаңа жұмыс орнын ашуға мүмкіндік беретін тоғыз жоба мақұлданды. Олар ауыл шаруашылығы, өнім өңдеу, көлік-логистика, табиғи тасты өңдеу, қонақүй бизнесі және жол бойындағы қызмет көрсету салаларын қамтиды.

Мұндай бастамалардың маңызы тек қаржы тартумен шектелмейді. Ең бастысы – жергілікті тұрғындарды тұрақты жұмыспен қамту, жаңа кәсіпорындар ашу және өңірдің өндірістік әлеуетін күшейту.

Абай облысы үшін аграрлық сектордың маңызы ерекше. Сондықтан ауыл шаруашылығын технологиялық тұрғыдан жаңғырту, су үнемдеу жүйелерін енгізу және жергілікті өнімді терең өңдеу мәселелері де назардан тыс қалған жоқ.

2026–2028 жылдарға арналған жол картасы аясында жалпы құны 112,5 миллиард теңгені құрайтын 19 инвестициялық жобаны жүзеге асыру көзделген.

Жобалар мал шаруашылығын дамытуға, ет және ауыл шаруашылығы өнімдерін өңдеуге, суармалы жерлердің көлемін арттыруға бағытталған. Сонымен қатар тамшылатып және жаңбырлатып суару технологияларын енгізу жоспарланып отыр.

Бұл бастамалар ауыл шаруашылығының өнімділігін арттырып қана қоймай, табиғи ресурстарды тиімді пайдалануға мүмкіндік береді. Әсіресе су тапшылығы мәселесі өзекті болып отырған кезеңде заманауи суару технологияларының маңызы зор.

Жолдауда азаматтардың өмір сүру сапасын арттыру, білім беру мен денсаулық сақтау салаларын дамытуға ерекше мән берілген.

Абай облысында бюджет қаражаты есебінен жалпы құны 35 миллиард теңгені құрайтын 28 әлеуметтік нысанда құрылыс және жөндеу жұмыстары жүргізілуде.

Семей қаласында «Абайға құрмет» акциясы аясында шығармашылық орталығы, медиа орталық, дене шынықтыру-сауықтыру кешені, инклюзивті спорт кешені, үстел теннисі орталығы, Жекпе-жек сарайы және Достық үйі салынып жатыр.

Сонымен қатар облыс орталығында алғаш рет BINOM мектебінің құрылысы басталды. Алдағы жылдары жаңа театр, облыстық аурухана және балалар ауруханасын салу жоспарланған.

Денсаулық сақтау саласында да оң өзгерістер бар. «Ауылдық денсаулық сақтауды жаңғырту» ұлттық жобасы аясында өңірде 65 алғашқы медициналық-санитариялық көмек нысаны салынған. Аудандық ауруханалардың материалдық-техникалық базасы нығайтылып, медициналық ұйымдарға жаңа жедел жәрдем көліктері берілуде.

Бұл жобалардың барлығы қала мен ауыл арасындағы әлеуметтік инфрақұрылым айырмашылығын азайтуға бағытталған.

Қазіргі кезеңде өңірдің дамуын заманауи технологияларсыз елестету мүмкін емес. Осыған байланысты Абай облысында 2026–2030 жылдарға арналған цифрлық трансформация стратегиясы әзірленуде.

Стратегия аясында жасанды интеллектіні ауыл шаруашылығы, білім беру, медицина және су ресурстарын басқару салаларына енгізу көзделген. Сонымен қатар Семей қаласында Smart City жобасын дамыту, интернет инфрақұрылымын кеңейту және мемлекеттік қызметтерді онлайн форматқа көшіру жоспарланып отыр.

Бұл бастамалар тұрғындарға көрсетілетін қызметтердің сапасын арттырып, мемлекеттік басқару жүйесінің тиімділігін күшейтуге мүмкіндік береді. Абай облысында жүзеге асырылып жатқан жобалар бір-бірімен тығыз байланысты. Жаңа теміржол мен автомобиль жолдары экономикалық байланыстарды кеңейтсе, өндіріс орындары жұмыс орындарын ашады. Ал әлеуметтік нысандардың салынуы тұрғындардың күнделікті өміріне тікелей әсер етеді. Әрине, кез келген жобаның тиімділігі оның жарияланған құнымен немесе басталған құрылысымен ғана өлшенбейді. Ең бастысы – нысандардың сапалы әрі уақытында аяқталуы, инвестициялардың нақты нәтижеге айналуы және жаңа мүмкіндіктердің қарапайым тұрғындарға қолжетімді болуы. Президент Жолдауында белгіленген міндеттерді өңірлік деңгейде жүзеге асырудың негізгі өлшемі де осы. Абай облысы үшін бүгінгі құрылыс пен жаңғырту жұмыстары – тек инфрақұрылымды өзгерту емес, болашақтың экономикалық және әлеуметтік негізін қалыптастыру. Демек, өңірдегі әрбір жаңа жол, өндіріс орны, мектеп пен медициналық нысан – ел дамуының ортақ мақсатына қосылған нақты үлес.

 

Пайдаланылған ақпарат көздері: